Саминжон ҲУСАНОВ/“Халқ сўзи”. Кузнинг ортга сари чекинаётган ҳар бир куни қиш фаслига яқинлаштирмоқда. Шу боис жойларда мавсумга тайёргарлик ишлари якунига етказилмоқда. Жумладан, “Ҳудудий электр тармоқлари” АЖ Андижон ҳудудий филиали томонидан таъминотдаги узилишларга барҳам берилмоқда.

— Андижон шаҳридаги “Боғи эрам” МФЙда электр энергияси таъминоти яхшиланди, — дейди жамият ходими Мухлисахон Собирова. — Ушбу манзилда 26 та симёғоч темир-бетон таянчларга алмаштирилиб, 1 кмдан зиёд электр узатиш тармоғи тортилди. Шунингдек, 1 та трансформатор пункти ўрнатилиб, мавжуд муаммо бартараф этилди.

Амалга оширилган саъй-ҳаракатлардан табиийки, аҳоли миннатдор!

— Ҳар йили куз-қиш мавсуми яқинлашгани сари электр энергияси таъминоти билан боғлиқ муаммолар ташвишимизни оширар эди, — дейди ушбу маҳаллада яшовчи Турсунбой Оқилов. — Сабаби, фавқулодда ҳолатларда чироқ ўчиб қолиши бир қанча муаммоларга сабаб бўлаётганди. Маҳалламизда амалга оширилган ишлар ёғин-сочинли кунларга қолмай якунига етиши натижасида электр энергияси таъминоти билан боғлиқ барча муаммоларимиз ижобий ечим топди.

Ҳудудда бажарилган бу вазифалар натижасида 100 дан ортиқ хонадонга хизмат кўрсатиш сифати янада яхшиланди.