БИРДАМЛИКДА ЎТАЙЛИК БУ СИНОВЛАРДАН...

Боболарим кечган қанча оловлардан, 
Қанча ёмғир, қанча дўл-у, қировлардан.
Эл бошига иш тушганда четда турмай, 
Бирдамликда ўтайлик бу синовлардан! 

Зўрмиз дея, – ютуқлардан керилмасдан, 
Енг шимариб киришайлик, эринмасдан.
Таҳликага, ваҳимага берилмасдан, 
Бирдамликда ўтайлик бу синовлардан! 

Кўксимизга жойлаб ору-номусларни, 
Ўқиб ўша, мерос қолган қомусларни.
Белин букиб, ҳар қанақа вирусларни, 
Бирдамликда ўтайлик бу синовлардан! 

Аҳил бўлиб яшаб қолган, бани одам, 
Ҳар тирик жон, бир-бирига бўлсин малҳам.
Асраганни асрар дерлар, Яратган ҳам, 
Бирдамликда ўтайлик бу синовлардан! 

Тентиб юрманг, – кўча-куйда куйиб, ёниб, 
Бетаҳлика кўнгилларга ваҳим солиб.
Керак бўлса, маълум муддат уйда қолиб, 
Бирдамликда ўтайлик бу синовлардан! 

Атрофда ким бордир тенгдош,  дўсту-ғаним, 
Ҳотам бўлинг, – қолмасин ҳеч кўнгли ярим.
Синовларда синиб қолманг Юртдошларим, 
Бирдамликда ўтайлик бу синовлардан! 

Шу эл асли етиштирган Синоларни, 
Илм билан лол қолдирган дунёларни.
Енгиб ташлаб, бошга тушган савдоларни, 
Бирдамликда ўтайлик бу синовлардан! 

Азал шундай – ҳақиқатни деган элмиз, 
Меҳрибонлик , мурувватни деган элмиз.
Бир майизни тенг бўлишиб еган элмиз, 
Бирдамликда ўтайлик бу синовлардан! 

Бир беғубор кунлар келар, ҳаловатлик , 
Ҳар дақиқа кечар файзу-фароғатлик.
Тиллога тенг бойлик экан, саломатлик , 
Бирдамликда ўтайлик бу синовлардан! 

Маҳаллалар – йўлларимиз тоза бўлсин, 
Дуо қилинг, – дилларимиз тоза бўлсин.
Вужудимиз, қўлларимиз тоза бўлсин, 
Бирдамликда ўтайлик бу синовлардан! 

Четга суриб, қийинчилик, азобларни, 
Сўз демасдан, ёлғон-яшиқ хитобларни.
Пок тан билан, юзга тутиб ниқобларни, 
Бирдамликда ўтайлик бу синовлардан! 

Сарсон бўлмай, пасту-баланд йўллар аро, 
Шаҳарлар-у, қишлоқлар-у, чўллар аро.
Огоҳ бўлсин – ҳушёр бўлсин, ҳар фуқаро, 
Бирдамликда ўтайлик бу синовлардан! 

Эл-юрт учун, иш ўрнидан кетмай нари, 
Ишламоқда, юртнинг азиз фарзандлари.
Томчилардан яралган денгиз сингари, 
Бирдамликда ўтайлик бу синовлардан! 

Эл соғлиги, – юрт бойлиги азал-абад, 
Соғлом авлод буюкликка этар журъат.
Сабр қилсак яхши кунлар келар албат, 
Бирдамликда ўтайлик бу синовлардан! 

Тангри Ўзи паноҳида асрар бизни, 
Катта-кичик, ёшу-қари, ўғил-қизни.
Балолардан омон сақлаб юртимизни, 
Бирдамликда ўтайлик бу синовлардан! 

КАМОЛИДДИН ШУКУР.​