Ҳар бир оила – қўрғон. Бу қўрғон ичида нима бўлаётгани ўзигагина аён. “Бир бор экан, бир йўқ экан...” дея болалигидан эртаклар ўқиб улғайган, онаси эртак қаҳрамонларига ҳавас қилиб исмини қўйган қуйичирчиқлик Малика Азимова (шарифи ўзгартирилди) ҳам ҳаётини бу қадар чигаллашиб кетишини хаёлига келтирмаган. Шундай оқкўнгил, меҳрибон, уқимишли аёлни суд залига етаклаган нима эди?

Малика келин бўлиб тушганда бошида ҳаммаси яхши, токи икки нафар фарзандли бўлгунча аҳил-иноқ яшаб келган. Турмуш ўртоғидан ажралгач, қайнотасининг ҳам унга нисбатан муносабати ўзгаради. Биргаликда яшаб келаётган хонадон ўртасида тўсиқ қўйилади. Шундан кейин бир ҳовлида яшаб туриб болалар ўз бобосидан узоқлашади. Турмушнинг зарбаларига чидолмай турмуш ўртоғидан ажралган Малика эса ҳовлининг бир бурчагида ёлғиз яшай бошлайди. Шунча пайтдан бери муросасиз жанжаллар ичида яшаб келаётган норасидаларнинг тақдири на санамай саккиз дейдиган қавму қариндошлар, на маҳалла-куй, на қўни қўшниларни ташвишга солади.

Малика ўзи яшаб турган хонадонни ўз номига ўтказишга киришади. Қайнотаси эса бунга асло рози бўлмасдан унга доим қаршилик кўрсатади. Маликанинг икки нафар вояга етмаган фарзанди бор, барча муаммони қонуний йўл билан ҳал қилса бўларди, аммо нафси бунга йўл қўймади. Қайнота ва келин ўртасида низо шу даражага етдики, Малика отаси тенги қайнотасини у томонга ўтгани учун кетмон билан елкасига туширади.

Тошкент шаҳар Бектемир тумани суди томонидан бу қилмиши учун Малика Азимовага уч йил озодликдан чеклаш жазоси тайинланди. Энди унинг ўндан олтига қадар уйдан чиқиш эркинлиги чекланди. Афсус, икки гулдек норасиданинг онаси, ҳаётини юксак орзу-мақсадлар билан эндигина бошлаётган аёл ўйламай босилган бир қадамининг жабрини уч йил тортади. Суд қарори билан танишиш асносида ҳақли саволлар туғилди: хўп, Малика қилмишига яраша жазо олди, лекин ҳозир ҳам у ўша хонадонда яшаяптими? Жазосини ўтагандан кейин яна келишмовчиликлар бўлмаслиги учун бу оилани маҳалла назоратга олганмикан? Болалар келажаги нима бўлади? Атрофдагиларнинг Маликага муносабати-чи? Даставвал сўзимизни бежиз эртаклардан бошламадик, Маликага ўхшаб ҳаётда оёғи тойганлар албатта, бундан тўғри хулоса чиқариши керак. Балки Малика ҳам сабр-қаноатли бўлиб, турмушнинг қийинчиликларига бардош берганда ўша хонадоннинг чинакам маликасига айланарди. Ҳаётимиз ҳам бамисоли эртак. Афсуски, бу эртакнинг маликалари фақатгина яхши ният билангина муродига етади, акс ҳолда, малика бўла туриб Маликадек ҳаётдан панд ейиши ҳечгапмас. Атоқли шоир А.Ориповнинг ушбу тўртлигидан ортиб нима ҳам дердик:

Шунчалар гўзалсан, гўзалсан санам,

Таърифинг битмоққа ожиздир қалам.

Бир йигит умрини обод этардинг,

Ақл ҳам берганда фалак бокарам.

Нурҳаёт ЎТАНИЁЗОВА,

ЎЗЖОКУ талабаси.