Фото: “Халқ сўзи”

Куз ва қиш фаслида мевали боғларда амалга оширилаётган агротехник тадбирлар доирасида Сирдарё вилояти Ўсимликлар карантини ва ҳимояси бошқармасининг туманлар бўлимлари инспекторлари томонидан   мевали боғларга тутқичли белбоғлар ўрнатилмоқда.

— Ушбу тутқичли белбоғлар тухум қўйиш учун дарахтлардан ерга ва кейин дарахтларга чиқиш учун ҳаракатланаётган зараркунанда ҳашаротларни тутиш ҳамда йўқ қилиш мақсадида қўлланилади,- дейди Ўсимликлар карантини ва ҳимояси   Сардоба тумани бўлими бошлиғи   Фурқат Ҳайдаров — Тузоқли белбоғнинг кенглиги 20-25 сантиметрни ташкил этиб, похол, сомон қанорқоп, поролон, полиэтилен каби материаллардан тайёрланади. Дарахтларнинг 40-45сантиметр баландликдаги силлиқ тана ҳамда новдаларига боғлаб чиқилади. Тузоқли белбоғларни ўрнатишда дастлаб дарахтнинг белбоғ ўрнатиладиган жойи қуриган пўстлоқ ва шох -шаббалардан тозаланади. Кейин эса дарахтга ўрнатилади.

Мутахассисларнинг айтишича, ушбу тадбир юқори самарадорлиги баробарида кам харажатлилиги билан ҳам муҳим аҳамиятга эга.

Аҳмадали ШEРНАЗАРОВ, “Халқ сўзи”.