Ўзбекистон Республикаси Қуролли Кучлари ташкил этилганлигининг 34 йиллиги ҳамда Ватан ҳимоячилари куни муносабати билан Андижон вилояти божхона бошқармаси ташаббуси билан умумтаълим мактабларида расмлар танлови ўтказилди. Мазкур танлов орқали ўқувчилар ҳарбий хизматчиларнинг фидокорона меҳнати, Ватанга садоқати ҳамда тинчлик ва осудаликнинг бебаҳо неъмат эканини рангтасвир асарлари орқали ифодаладилар.

Жумладан, Андижон шаҳридаги 50-сонли умумтаълим мактабида бўлиб ўтган танловда юзлаб ўқувчилар фаол иштирок этди. Бошланғич ва юқори синф ўқувчилари қамраб олинган ушбу тадбирда тасвирий санъатга қизиқувчи ёшлар миллий армиямизга бўлган муносабати ва тасаввурларини ижодий ишлар орқали намоён этдилар.

— Бу танловда мен аскарларимизнинг фидокорона хизмати, Ватанга бўлган садоқатини расм орқали акс эттиришга ҳаракат қилдим, — дейди мазкур мактаб ўқувчиси Санжарбек Аҳмедов. — Уларнинг жасорати ва матонати биз, ёшлар учун катта ибрат. Келгусида ўзим ҳам ҳарбий хизматчи бўлиб, юртимиз тинчлиги ва хавфсизлигини ҳимоя қилишни орзу қиламан.

Танлов якунида ёш тоифалари бўйича энг чиройли ва мазмунан бой ижодий ишлар сараланиб, ғолиблар Андижон вилояти божхона бошқармасининг диплом ва эсдалик совғалари билан тақдирландилар.

Қайд этилишича, бундай тадбирлар ёш авлодда ватанпарварлик туйғуларини мустаҳкамлаш, миллий армияга бўлган ҳурматни ошириш ҳамда уларни эзгу мақсадлар сари йўналтиришда муҳим аҳамият касб этади.

Саминжон ҲУСАНОВ, «Халқ сўзи».