Париж яқинидаги «Thoiry» ҳайвонот боғида 37 ёшли аёлга учта бўри ҳужум қилди. Бу ҳақда «Deutsche Welle» нашри хабар берди. Маълум қилинишича, аёл оғир жароҳат олган.

Воқеа аёл оиласи билан боғдаги ложалардан бирида вақт ўтказаётганда содир бўлган. Версал бош прокурори Мэривонн Кайлиботт жабрланувчининг ҳаёти хавф остида бўлганини, аммо кейин унинг аҳволи анча барқарорлашганини маълум қилган.

Ҳужум автомобиллар юра олмайдиган “сафари зонаси”га кетаётганда содир бўлган. Аёл хавфсизлик қоидаларини қай тариқа бузгани маълум эмас, аммо Версал бош прокурори ҳаммасини аниқлашини билдирган. Воқеа жойига тезда етиб келган боғ ходимлари бўриларни аёлдан узоқлаштиришган, шу сабабли ҳам аёл омон қолган.

«Thoiry» ҳайвонот боғи 1968 йилда ташкил этилган бўлиб, Париждан 40 километр ғарбда жойлашган. Ушбу муассаса меҳмонларга ҳайвонларга яқин бўлиши мумкин бўлган сафари услубидаги ложаларни таклиф этади. Ложалардан туриб Арктика бўриларини томоша қилиш мумкин.

Маълумот учун айтиш мумкинки, бу ҳайвонот боғи 150 гектар майдонни қоплаб олган бўлиб, унда 100 турдаги 1500 га яқин ҳайвонлар яшайди.