Кейинги йилларда Ўзбекистон Республикасининг етакчи олий таълим муассасалари халқаро таълим хизматлари бозорида ўзларининг рақобат мавқейини мустаҳкамлашга ҳаракат қилмоқдалар. Халқаро рейтинг агентликлари томонидан шакллантириладиган етакчи университетлар рўйхати ҳар бир рейтинг агентлигининг услубиёти асосида университетларнинг академик, илмий, моддий техник ва молиявий салоҳиятининг айрим жиҳатларини ёритиб беради. Уларнинг энг хусусиятли жиҳатларидан бири юқорида тилга олинган салоҳият элементларини умумий рейтинг кўрсаткичларидаги вазнининг ҳар хил эканлигидадир. Дунёнинг энг нуфузли рейтинг ташкилотларидан бири ҳисобланган Times Higher Education (THE) 2023 йил натижаларини эълон қилди.

Рейтинг асосий мақсади Бирлашган миллатлар ташкилоти томонидан 2030 йилга қадар мўлжалланган Барқарор ривожланиш мақсадларини (BRM) амалга оширишда олий таълим муассасаларининг (ОТМ) таъсирини баҳолашдан иборатдир. THE University Impact Rankings умумий рейтингида иштирок этиш учун университет камида тўртта BRMни амалга оширишда иштирок этиши керак. Ўтган йилда Алишер Навоий номидаги Тошкент давлат ўзбек тили ва адабиёти университети илк бор ушбу рейтингга киритилди ва жаҳоннинг энг яхши 1000+ университетлари қаторидан жой олди.

Университетда барқарор ривожланиш мақсадларининг барча йўналишларида самарали фаолият йўлга қўйилганини 2023 йил натижалари ҳам кўрсатиб турибди. Бу йил натижаларига кўра Алишер Навоий номидаги Тошкент давлат ўзбек тили ва адабиёти университети дунёнинг энг яхши 600+ ОТМлари қаторидан жой олди. Иккинчи йилдаги иштирокнинг ўзидаёқ қарийб 400 ўринга юқорилаш мисли кўрилмаган ижобий натижадир. Айниқса, гендер тенгликни таъминлаш ва хотин-қизлар таълимига қаратилаётган эътибор бўйича дунёнинг топ 20 та университетлари қаторидан ўрин эгаллади. Бу энг аввало, университетда таълим ва тарбия жараёнининг тўғри йўлга қўйилгани, жамоанинг тизимли ва самарали фаолияти натижасидир.

Бу йил университет мазкур рейтинг доирасида Ўзбекистон ОТМлари орасида етакчилик қилмоқда.