Фото: Халқ сўзи

Наманган вилояти Чуст туманидаги 11-умумтаълим мактабида жисмоний тарбия муаллими бўлиб ишлаб келаётган Шуҳратбек Раҳмонов автомобилсозлик соҳасида катта ютуқларга эришмоқда. Аввалига спортнинг эркин кураш тури билан шуғулланиб, халқаро миқёсдаги чемпион  даражасигача кўтарилган бу инсон охирги пайтларда ёшликдан бўлган қизиқиши-техника йўналишидаги ихтирочиликка киришиб кетди. Дастлабки изланиши маҳсули бўлган юк ташувчи мотоцикль, катта тезликка мослаштирилган квадрацикль, кичик автомашина кўринишидаги ихтироларининг  кўпчиликка маъқул тушиши уни янгидан-янги инновацион ишланмалар сари илҳомлантирди.

- Аввалги йили  мамлакатимиз пойтахтида ўтказилган кўргазмада  “Baggi” моделидаги замонавий спорт автомобили кўринишидаги лойиҳам  Инновацион ривожланиш агентлиги эътиборини тортди,-дейди Ш. Раҳмонов.  – Янгилигимни қўллаб-қувватлаб,  амалиётга татбиқ этиш учун 76,5 миллион сўм маблағ ажратишди. Бир йил ичида йўл танламас, яъни, ботқоқлик, тоғли ва бошқа нотекис йўлларда бемалол ҳаракатлана оладиган ихчам транспорт воситасини  тиклашга муваффақ бўлдим. 

Ихтирочи  муаллим  “Peredator” дея  ном қўйган тезкор автоулов тўла маҳаллий бутловчи қисмлардан яратилган бўлиб,  уни йиғишда  “Damas”нинг двигатели ҳамда “Ваз-2106”нинг узатмалар қутисидан фойдаланилган.

Албатта, ихтиро ўз муаллифига яхшигина наф  келтиради. Шу пайтга   қадар  бешта автомобиль прототипини яратиб, элга намойиш этган чустлик муаллим ҳам изланишларига яраша даромад топиб, моддий аҳволини юқори даражага кўтаришга эришди. Бошқа жиҳати, у ҳозиргача эришганлари билан чекланиб қолмоқчи эмас. Яна янги лойиҳалар устида бош қотираётир.

Қудратилла НАЖМИДДИНОВ, “Халқ сўзи”.