Foto: Xalq so'zi

Namangan viloyati Chust tumanidagi 11-umumta’lim maktabida jismoniy tarbiya muallimi bo‘lib ishlab kelayotgan Shuhratbek Rahmonov avtomobilsozlik sohasida katta yutuqlarga erishmoqda. Avvaliga sportning erkin kurash turi bilan shug‘ullanib, xalqaro miqyosdagi chempion  darajasigacha ko‘tarilgan bu inson oxirgi paytlarda yoshlikdan bo‘lgan qiziqishi-texnika yo‘nalishidagi ixtirochilikka kirishib ketdi. Dastlabki izlanishi mahsuli bo‘lgan yuk tashuvchi motosikl, katta tezlikka moslashtirilgan kvadrasikl, kichik avtomashina ko‘rinishidagi ixtirolarining  ko‘pchilikka ma’qul tushishi uni yangidan-yangi innovasion ishlanmalar sari ilhomlantirdi.

- Avvalgi yili  mamlakatimiz poytaxtida o‘tkazilgan ko‘rgazmada  “Baggi” modelidagi zamonaviy sport avtomobili ko‘rinishidagi loyiham  Innovasion rivojlanish agentligi e’tiborini tortdi,-deydi Sh. Rahmonov.  – Yangiligimni qo‘llab-quvvatlab,  amaliyotga tatbiq etish uchun 76,5 million so‘m mablag‘ ajratishdi. Bir yil ichida yo‘l tanlamas, ya’ni, botqoqlik, tog‘li va boshqa notekis yo‘llarda bemalol harakatlana oladigan ixcham transport vositasini  tiklashga muvaffaq bo‘ldim. 

Ixtirochi  muallim  “Peredator” deya  nom qo‘ygan tezkor avtoulov to‘la mahalliy butlovchi qismlardan yaratilgan bo‘lib,  uni yig‘ishda  “Damas”ning dvigateli hamda “Vaz-2106”ning uzatmalar qutisidan foydalanilgan.

Albatta, ixtiro o‘z muallifiga yaxshigina naf  keltiradi. Shu paytga   qadar  beshta avtоmobil prototipini yaratib, elga namoyish etgan chustlik muallim ham izlanishlariga yarasha daromad topib, moddiy ahvolini yuqori darajaga ko‘tarishga erishdi. Boshqa jihati, u hozirgacha erishganlari bilan cheklanib qolmoqchi emas. Yana yangi loyihalar ustida bosh qotirayotir.

Qudratilla NAJMIDDINOV, “Xalq so‘zi”.