— Ўзбек кино санъати халқ олдидаги, томошабинлар олдидаги, раҳбарият олдидаги ўз бурчини адо этяптими, деган савол туғилади. Жавоб шуки, адо этяпти, яъни тўлиқ бўлмаса-да, лекин бажаряпти, — дейди Ўзбекистон халқ артисти Ёқуб Аҳмедов.

Хўш, нега тўлиқ эмас? Мен томошабинлар, ҳамкасбларим билан кўп суҳбатда бўламан. Битта масалани, яъни маблағ масаласини айтишади.

Куни кеча Президентимиз имзолаган ҳужжатлар нафақат маблағ масаласига, балки жуда кўплаб муаммоларга чек қўйди. Ижодкорлар билан учрашувда давлатимиз раҳбари бизга ушбу соҳада ривожи учун маблағ топиб беришини, лекин биздан халқни, ёшларни тарбиялайдиган киномаҳсулотлар тайёрлашимиз кераклигини таъкидлаган эди.

Бу кино соҳасига давлат сиёсати даражасида эътибор қаратилаётганидан далолат. Ишончни эса оқлашимиз керак, айниқса, ёшлар. Ўзбек кино санъатида талантли ёшлар бир оз камайиб қолгандай назаримда. Кўп айтаман, ёшларни тарбиялайлик, ахир келажагимиз ёшлар қўлида, деб. Энди бу масала ҳам ҳал бўлади. Демак, зиммамиздаги асосий вазифа — пишиқ-пухта, мукаммал фильмлар, спектакллар яратиш, томошабинларнинг кўнглига киришдир.