Telegram мессенжери асосчиси Павел Дуров Европа Иттифоқини ўз назоратидаги нодавлат ташкилотлар ва ОАВ орқали интернетда кузатув ва цензурани кучайтиришни оқлашга уринишда айблади. У бу ҳақда ўзининг Telegram каналида пост қолдирди.

Дуровнинг сўзларига кўра, Брюссель AI Forensics тузилмасидан фойдаланмоқда. Тадбиркорнинг таъкидлашича, ушбу ташкилот Еврокомиссия учун ишлайди ва Жорж Сорос томонидан молиялаштирилади.

«Сорос томонидан молиялаштириладиган ва Еврокомиссия учун ишлайдиган AI Forensics ташкилоти Telegramʼни муаммо деб ҳисобламоқда, чунки одамлар бошқа ижтимоий тармоқлардаги контентни ёпиқ Telegram гуруҳларида муҳокама қилишлари мумкин», — деб қайд этди мессенжер асосчиси.

Павел Дуров ўз постига Франциянинг France24 телеканали мақоласидан скриншот илова қилган. Мақолада одамлар ижтимоий тармоқлардаги ҳақоратли контентларни бир-бирларига юбориши ва бунинг учун Telegramʼдан фойдаланиши айтилади.

Тадбиркор, шунингдек, унинг фикрича, ушбу «нодавлат» ташкилотнинг «ақл бовар қилмайдиган иддаоларини» тарқатаётган нашрлар рўйхатини тузди. Бу рўйхатга El País, Der Spiegel, Wired, AFP, Le Parisien, 20 Minutes, Ouest-France ва Le Figaro кирди.

«Жамиятни манипуляция қилишга бўлган бундай уринишларни тўхтатиш муҳим, чунки улардан эркинлигимизнинг қолган-қутган қисмини ҳам тортиб олиш учун фойдаланишади», — деб таъкидлади Telegram асосчиси.

Дуровнинг айтишича, кимлардир ҳалиям бу каби ташкилотларни жиддий қабул қилмоқда. Унинг қўшимча қилишича, уларнинг аксарияти «COVID даврида одамларнинг ишончини йўқотган».

Аввалроқ Telegram асосчиси Европа давлатларини технологик компанияларга нисбатан юритаётган сиёсати учун бир неча бор танқид қилган эди. Унинг фикрича, Европа Иттифоқи агар компаниялар «сўз эркинлигини индамай чеклашдан» бош тортса, уларни жазолаш учун «бажариб бўлмайдиган қоидалар»ни жорий қилмоқда.