НАТО бош котиби Марк Рютте АҚШнинг Эронга қарши ҳарбий операцияси давомида альянсга аъзо айрим давлатлар ўз мажбуриятларини бажармаганини маълум қилди. Бу ҳақда у CNN телеканали эфирида айтиб ўтди.

Чоршанба куни (8 апрель) Марк Рютте Оқ уйда Америка етакчиси Дональд Трамп билан учрашув ўтказди.

Учрашув якунларига кўра, НАТО бош котиби АҚШ Президенти альянсдаги кўплаб иттифоқчиларидан норози эканлигини қайд этди. Рютте унинг «нуқтаи назарини тушунишини» қўшимча қилди.

Шунингдек, Рютте «Европа мамлакатларининг мутлақ кўпчилиги» логистика билан ёрдам берганини, ўз базаларини тақдим этганини ва бошқа турдаги қўллаб-қувватловларни амалга оширганини айтиб ўтди.

Дональд Трамп Марк Рютте билан учрашувдан сўнг Truth Social ижтимоий тармоғида қуйидаги мазмундаги пост қолдирди:

«Биз уларга муҳтож бўлганимизда НАТО у ерда йўқ эди ва улар яна керак бўлганда ҳам у ерда бўлишмайди», — деб ёзди у.

Аввалроқ хорижий ОАВ АҚШ Президенти Дональд Трамп маъмурияти Эронга қарши операция вақтида ёрдам бермаган НАТО мамлакатларидан ўз қўшинларини олиб чиқиб кетиш имкониятини кўриб чиқаётгани ҳақида хабар берган эди.