NATO bosh kotibi Mark Ryutte AQSHning Eronga qarshi harbiy operatsiyasi davomida alyansga aʼzo ayrim davlatlar oʻz majburiyatlarini bajarmaganini maʼlum qildi. Bu haqda u CNN telekanali efirida aytib oʻtdi.

Chorshanba kuni (8-aprel) Mark Ryutte Oq uyda Amerika yetakchisi Donald Tramp bilan uchrashuv oʻtkazdi.

Uchrashuv yakunlariga koʻra, NATO bosh kotibi AQSH Prezidenti alyansdagi koʻplab ittifoqchilaridan norozi ekanligini qayd etdi. Ryutte uning “nuqtayi nazarini tushunishini” qoʻshimcha qildi.

Shuningdek, Ryutte “Yevropa mamlakatlarining mutlaq koʻpchiligi” logistika bilan yordam berganini, oʻz bazalarini taqdim etganini va boshqa turdagi qoʻllab-quvvatlovlarni amalga oshirganini aytib oʻtdi.

Donald Tramp Mark Ryutte bilan uchrashuvdan soʻng Truth Social ijtimoiy tarmogʻida quyidagi mazmundagi post qoldirdi:

“Biz ularga muhtoj boʻlganimizda NATO u yerda yoʻq edi va ular yana kerak boʻlganda ham u yerda boʻlishmaydi”, — deb yozdi u.

Avvalroq xorijiy OAV AQSH Prezidenti Donald Tramp maʼmuriyati Eronga qarshi operatsiya vaqtida yordam bermagan NATO mamlakatlaridan oʻz qoʻshinlarini olib chiqib ketish imkoniyatini koʻrib chiqayotgani haqida xabar bergan edi.