«Миллий тикланиш» демократик партияси раиси Алишер Қодиров хотиржам яшашни истаган ҳамма даромадидан солиқ тўлаши шарт эканини айтди.

Алишер Қодиров «Ҳарбий хизматчилар (ходимлар) ва уларнинг оила аъзоларининг давлат пенсия таъминоти тўғрисида»ги қонуннинг қабул қилиниши давлат бюджетидан қўшимча маблағлар ажратилишини тақозо қилишини қайд этиб, ушбу ҳужжатнинг нима сабабдан муҳим эканига тўхталиб ўтган.

«Ҳарбий хизматчи ўзи ва оиласини ижтимоий ҳимояланганидан шубҳаланмаслиги керак!» дейди депутат.

Унинг қўшимча қилишича, давлат бюджетидаги бу харажатлар ҳам солиқлар ҳисобидан бўлади. Шу боис, «хотиржам яшашни истаган ҳамма даромадидан солиқ тўлаши шарт!»

«Ҳарбийлар тушунарли, туғилганимизда ювиб-тараб қўйган доя холадан бошлаб, ҳаммамизни албатта борадиган жойимиз — қабристонларни озода тутишга масъул амакигача солиқлар ҳисобига ҳақ олади ва даромадидан солиқ тўлайди», деб ёзади Қодиров.

У, шунингдек, солиқдан қочиш ёки солиқ тўламасликни тарғиб қилиш бировнинг ҳақига хиёнат ва давлатга нисбатан жиноят сифатида баҳоланиши кераклигини таъкидлаган. — Ҳарбий хизматчилар Ватан ҳимоясида мустаҳкам турсинлар, қонун янги таҳрирда, биринчи ўқишда маъқулланди, лекин жамиятни айрим қатламларида давлатпарварликни кучайтириш учун фақат тарғибот эмас, қонунчиликни такомиллаштириш ҳақида ҳам ўйлаш керак экан…

Депутатнинг бу фикрлари бир гуруҳ санъаткорлар тўйлардан оладиган пулига солиқ солинишига нисбатан норозилик билдираётган бир вақтда янгради.