Иллюстратив фото

АҚШ президенти Дональд Трамп мамлакат қуролли кучлари Эрон осмонида уриб туширилган F-15 қирувчи самолёти экипажи аъзосини қутқариш бўйича «АҚШ тарихидаги энг дадил қидирув-қутқарув амалиётларидан бири» амалга оширилганини маълум қилди. Бу ҳақда у ўзининг «Truth social» ижтимоий тармоғида хабар берди.

Унга кўра, америкалик ҳарбий Эроннинг тоғли ҳудудида, душман назорати остида қолганига қарамай, муваффақиятли эвакуация қилинган.

«Биз уни топдик! Сўнгги бир неча соат ичида АҚШ ҳарбийлари тарихимиздаги энг дадаил қидирув-қутқарув амалиётларидан бирини амалга оширди. Мен сизларга у ҳозир соғ-саломат эканини мамнуният билан маълум қиламан», деб ёзди Трамп ўз баёнотида.

Оқ уй раҳбарининг қайд этишича, полковник унвонига эга бўлган учувчи душман ҳудудида бўлганига қарамай, унинг жойлашуви 24 соат давомида кузатиб борилган ва қутқариш режаси пухта тайёрланган. Унинг буйруғи билан қутқарув амалиётига дунёдаги энг кучли қуроллар билан жиҳозланган ўнлаб ҳарбий самолётлар жалб қилинган. Учувчи жароҳат олган бўлса-да, унинг аҳволи яхши экани таъкидланган.

Трамп бир кун аввал яна бир америкалик учувчи ҳам қутқарилганини, аммо иккинчи операцияга хавф туғдирмаслик учун бу ҳақда дарҳол хабар берилмаганини ҳам айтган. У, шунингдек, бу амалиётлар давомида бирорта америкалик ҳарбий ҳалок бўлмагани ва ҳатто жароҳат олмаганини АҚШнинг Эрон осмонида тўлиқ ҳаво устунлигига эришгани билан изоҳлаган.

Қўшимча қилинишича, ҳарбий тарихда илк бор икки нафар америкалик учувчи душман ҳудудининг ичкарисида алоҳида-алоҳида тарзда қутқарилган.

Аввалроқ Эрон Ислом инқилоби муҳофизлари корпуси АҚШ ва Исроил билан зиддият бошланганидан буён иккинчи F-35 қирувчи самолёти уриб туширилганини маълум қилган эди.

Tasnim агентлиги дастлаб катапульта орқали тушган учувчи асирга олинган бўлиши мумкинлигини ёзган. Кейинчалик эса Теҳрон учувчини ушлаш учун мукофот эълон қилгани ҳақида хабарлар тарқалди, бу эса аввалги маълумотларга зид келади.