Фото: Мудофаа вазирлиги

Эртага, 4 апрель куни Тошкент шаҳрида Амир Темур таваллудининг 690 йиллиги муносабати билан Қуролли Кучлар таркибига кирувчи вазирлик ва идоралар ҳарбий бўлинмаларининг тантанали пиёда юриш маросими бўлиб ўтади.

Мудофаа вазирлиги ахборот хизмати хабарига кўра ҳарбий бўлинмаларнинг тантанали пиёда юришлари Ўзбекистон Республикаси Ҳарбий хавфсизлик ва мудофаа университетидан соат 08:00 да бошланади ва 12:30 га қадар давом этади.

Маълум қилинишича, ҳарбий бўлинмалар дастлаб бошланиш нуқтаси («Пушкин» метро бекати яқинида)дан «Паркент» ва «Мустақиллик» кўчалари бўйлаб Амир Темур жанговар байроғини кўтарган ҳолда, бугунги кундаги жанговар ва кундалик ҳарбий либослар билан бирга ўша даврга оид қурол-аслаҳа ва кийим бошда ҳаракатланади.

Шунингдек, Амир Темур хиёбонидаги тўхташ нуқтасида театр саҳналари, фахрий қоровул жамоаси ва қўл жанги усталарининг кўргазмали чиқишлари, бўлинмаларнинг жанговар чақириғи, ҳарбий оркестрнинг дефиле намойишлари ижро этилади. Шундан сўнг бўлинмалар «Мустақиллик» ва «Темирйўл» кўчалари бўйлаб ортга қайтади.

Мазкур тадбир муносабати билан 4 апрель куни юқорида келтирилган кўчаларда соат 08:00 дан 12:30 гача бўлган вақт оралиғида автотранспорт воситалари ҳаракати вақтинчалик чекланади.

«Юзага келаётган ноқулайликлар учун узр сўраймиз ва барчани ушбу тадбирларда фаол иштирок этишга чорлаймиз!» дейилади вазирлик хабарида.