Фото: ДХХ

Андижон вилоятида ҳуқуқни муҳофаза қилувчи идоралар томонидан ўтказилган тезкор тадбир давомида аҳоли саломатлигига жиддий хавф туғдирувчи, сифати кафолатланмаган дори воситаларининг ноқонуний сақланаётгани фош қилинди. Бу ҳақда Давлат хавфсизлик хизмати хабар берди.

Маълум бўлишича, Андижон шаҳри ҳамда Асака туманида истиқомат қилувчи 3 нафар фуқаро ўз яшаш хонадонларида қалбаки ва сифати кафолатланмаган тиббий дори воситаларини тайёрлаш билан шуғулланган.

ДХХ Чегара қўшинлари ва Божхона органлари ҳамкорлигида ўтказилган тезкор тадбирда ушбу манзилларда махсус жиҳозланган ноқонуний лабораториялар борлиги аниқланган. Шунингдек, умумий қиймати 1,1 млрд сўмлик, жами 122 турдаги, 60 минг донадан ортиқ тиббий дори воситалари ашёвий далил сифатида олинган.

Дастлабки маълумотларга кўра, мазкур маҳсулотлар Қирғизистондан ноқонуний равишда олиб кирилган бўлиб, уларнинг бир қисми ярим тайёр, яна бир қисми эса қайта ишланган ҳолатда бўлган. Мутахассисларнинг таъкидлашича, ушбу дори воситалари инсон саломатлиги учун жиддий хавф туғдириши мумкин.

Қайд этилишича, ҳозирда аниқланган ҳолат юзасидан суриштирув ишлари олиб борилмоқда.