Кеча, 27 март куни FIFA Series мусобақасининг 1-тури доирасида Ўзбекистон терма жамоаси Габон жамоасини 3:1 ҳисобида мағлубиятга учратди. Учрашувдан сўнг Ўзбекистон миллий терма жамоаси устози Фабио Каннаваро матбуот анжуманида иштирок этди.

Бугун биринчи бўлимда ҳимояда бироз хатолар кузатилди. Танаффусда қандай кўрсатма бердингизки, улар ишонч билан ҳаракат қилишни бошлашди ва Жаҳонгир Ўрозовнинг ўйинига тўхталиб ўтсангиз.

«Биринчи тайм билмайман нега, ўзимизга ишонмаган кўринди. Концентрация юз фоиз эмас эди. Танаффусда уларга ҳар доим қилишимиз керак бўлган ишни қилишимиз кераклигини айтдим. Тактика томонлама ўзгаришлар қилдик, лекин асосийси руҳий муаммо эди. Бизнинг мотивациямиз рақибларга қарамасдан, ҳар доим юқори даражада бўлиши керак. Биз ҳар доим майдонга ғалаба учун чиқишимиз керак. Шунингдек, бир хил мотивация билан чиқиш керак. Бундай беқарорликка йўл қўймаслигимиз зарур. Масалан, сўнгги дақиқаларда кўрдингиз, ўйин бизнинг назоратимиз остида ўтаётган эди, лекин жуда ҳам хавфли ҳужумлар бўлди».

Бугун терма жамоамиз стандарт вазиятдан гол урди. Стандартлар машғулотларда алоҳида ишланмоқдами ёки футболчилар ўйиндан келиб чиқиб шундай қарорга келишдими?

«Албатта, машғулотларда барча жиҳатлар устида ишлаймиз. Агар клубда бир мавсум давомида стандарт вазиятларда 14–15 та гол уриш мумкин бўлса, яхши ҳужумчини сотиб олиш керак бўлади. Терма жамоада эса бор-йўғи 2–3 кун вақт бор. Кўпинча вақт етмайди. Барчасини ҳисобга олишимиз керак. Замонавий футболда кичик деталларга эътибор бермасак, ғалаба қозона олмайсиз».

Кеча навбатдаги икки ўйинда барча футболчиларга имконият бераман деб айтгандингиз, аммо бугун бўлмади. Бугунги назорат ўйини Игорь Сергеевни синаб олиш учун яхши вақт эмасмиди? Дастлабки ўзгариш эса 76-дақиқада рўй берди. Менимча, бу жуда кеч...

«Бугун 8 та футболчи захирадан ўйинга қўшилди. Яна қандай саволлар бўлиши мумкин?»

76 дақиқада ўзгариш қилиш кеч эмасми?

«Балким менинг ўрнимга мураббий бўларсиз. Мен сизнинг фикрингизни ҳурмат қиламан. Мен терма жамоага жуда кўплаб футболчиларни жалб этдим. Дастлабки 8 та учрашувда нечта футболчи терма жамоада ўйнаганини ҳисоблаб кўринг».

Бугун ўнг қанотда Азиз Ғаниев ҳаракат қилмоқда. Лекин ҳозирги кунда Суперлигада ўзининг энг яхши даврини ўтказаётган Жамшид Искандеров бор, бугун биз уни асосийда ёки захирадан майдонга тушишини кутган эдик. Нима учун футболчига имконият берилмади ва Венесуэлага қарши ўйинда майдонга тушадими?

«Дубайдаги клубида ўнг қанотда ҳаракат қилади. Жамшид Искандеров ҳам жамоанинг бир бўлаги ҳисобланади. Биз унинг иқтидорини биламиз. Албатта, биз барчага ҳаракат қилиши учун етарлича вақт берамиз».

Габон терма жамоаси бугун 4 xG қайд этди. МТЖ мундиал саралаши давомидаги Эронга қарши ўйинларда ҳам бундай статистикани қайд этмаган эди. Ушбу ҳолат сиз учун қанчалик нормал?

«Эътибор етарлича эмас эди. Баъзида аҳмоқона хатоларга йўл қўйдик. Бу шунинг натижасида рўй берди».

Абдуқодир Ҳусанов кейинги ўйинга қайтади. Биз Венесуэлага қарши ўйинда яна янги номларни кўришимиз мумкинми, Жаҳонгир Ўрозов каби футболчилар сингари?

«Ҳозир ўйинчиларимиз қайта тикланиши керак. Яхши ухлаб, дам олишлари зарур. Эртага эрталаб машғулотимиз бор. Бизда ҳали ҳам тикланиш давом этади. Шунинг учун бизнинг вақтимиз кўп бу ҳақда ўйлаб кўришга. Бироқ бизнинг асосий эътиборимиз — ҳар доим янги ўйинчиларни кўриш, лекин ўз навбатида мувозанатни ҳам ушлашимиз керак. Агар ютқазиб қўйсак, сизлар келиб менга эътироз билдирасизлар. Бу менинг жуда кўп футболчини алмаштириб юборганим учун рўй беради. Шу сабаб ҳар доим ўйлаган ҳолда энг яхши ечимни топишга интиламан».