Халқаро футбол федерацияси (ФИФА) 2026 йилги жаҳон чемпионатида қоидаларга ўзгартиришлар киритишни режалаштирмоқда, деб ёзади «Чемпионат» нашри.

Унга кўра, алмаштирилган ўйинчи майдонни тарк этиши учун кўпи билан 10 сония вақт берилади. Агар у ушланиб қолса, уни алмаштириш бир дақиқага кечиктирилади ва жамоа вақтинча камчиликда қолади.

Тўпни ёндан ташлаш (аут) ва дарвозадан тўп киритишда беш сониялик таймер қўлланилади. Ушбу вақтдан ошиб кетиш тўпга эгалик қилиш ҳуқуқини йўқотишга олиб келади.

Майдонда тиббий ёрдам олаётган ўйинчи майдонни тарк этиши ва қайтишдан олдин бир дақиқа кутиши керак бўлади. Бу қоида фақат жароҳат карточка билан жазоланган қоидабузарлик туфайли етказилмаган ҳолатларга тегишли.

VAR тизими қизил карточкага олиб келадиган иккинчи сариқ карточкаларни, шунингдек, хато белгиланган бурчак тўпларини қайта кўриб чиқиш имкониятига эга бўлади.

Бундан ташқари, фақат жамоа сардори тушунтириш сўраш учун ҳакамга яқинлашиши мумкинлиги ҳақидаги қоидани кучайтириш режалаштирилган. Бошқа ўйинчиларга бундай ҳолатда сариқ карточка кўрсатилиши мумкин.

Эслатиб ўтамиз, 2026 йилги жаҳон чемпионати АҚШ, Канада ва Мексикада 11 июндан 19 июлгача бўлиб ўтади.