Тошкент шаҳрида нарколаборатория фош қилинди. Бу ҳақида «Хавфсизлик» Telegram-канали хабар берди.

Билдирилишича, Давлат хавфсизлик хизматининг Тошкент вилояти бўйича бошқармаси ҳамда Ички ишлар органлари ходимлари ҳамкорлигида олиб борилган тезкор-қидирув тадбирлари натижасида, Сергели туманида нарколаборатория фош этилган.

Тезкор тадбир давомида Тошкент вилоятининг Чиноз туманида яшовчи, 2003 йилда туғилган шахс кўп қаватли уйлардан биридаги хонадонни ижарага олиб, нарколаборатория ташкил этгани маълум бўлган.

Шундан сўнг, ушбу манзилдан умумий қиймати 4,5 миллиард сўмга тенг бўлган 3,5 кг «Прегабалин» кучли таъсир қилувчи моддаси, 20 литр суюқ ва 25 кг кукун кўринишидаги прекурсорлар, шунингдек, уларни тайёрлаш ва қадоқлашда фойдаланиладиган анжомлар ашёвий далил сифатида расмийлаштириб олинган.

Бундан ташқари, нарколабораторияда кимёгар бўлиб ишловчи яна бир чинозлик фуқаро ҳам қўлга олинган. Аниқланишича, мазкур шахслар дастлаб «Telegram» мессенжери орқали фаолият юритувчи наркодўконда «кладмен» сифатида кучли таъсир қилувчи дори воситаларини тарқатиш билан шуғулланиб келган. Кейинчалик жиноий гуруҳ раҳбарларининг ишончига кириб, бевосита ажал оғусини тайёрлашга жалб этилишган.

Ҳозирда мазкур ҳолат юзасидан наркосавдогарларга нисбатан ДХХ Тошкент вилояти бўйича бошқармаси Тергов бўлими томонидан жиноят иши қўзғатилиб, «қамоқ» эҳтиёт чораси қўлланилган. Ҳозирда тергов ҳаракатлари олиб борилмоқда.