АҚШ ва Исроилнинг Эронга қарши ҳарбий операцияси натижасида шикастланган Форс кўрфази мамлакатларидаги энергетика инфратузилмасини тиклаш учун камида 25 миллиард доллар миқдорида инвестиция талаб этилади. Бу ҳақда ТАСС хабар бермоқда.

— Яқин Шарқдаги уруш нефть ва газ етказиб беришда жиддий глобал узилишларга олиб келди. Бутун минтақа бўйлаб суюлтирилган табиий газ ишлаб чиқариш линиялари, нефтни қайта ишлаш заводлари, ёқилғи терминаллари ва газни суюқ ёқилғига айлантирувчи муҳим корхоналарнинг шикастланиши ва иши тўхтаб қолиши қайд этилди. Дастлабки баҳолашларга кўра, бугунги кунда энергетика инфратузилмасини таъмирлаш ва тиклаш харажатлари камида 25 миллиард долларни ташкил этиши мумкин, — дейилади Rystad Energy консалтинг компанияси баёнотида.

Энг кўп зарар кўрган объектлар сирасига Қатардаги газни суюлтириш, сақлаш ва жўнатиш бўйича асосий қувватлар жамланган Рас-Лаффан саноат кластери ҳамда Эрондаги йирик Жанубий Парс газ кони киради.

Бундан ташқари, Баҳрайннинг Bapco Energies компаниясига қарашли нефтни қайта ишлаш заводига ҳам сезиларли зарар етказилган.