Эрон ҳукумати АҚШнинг Исломободда (Покистон) музокаралар ўтказиш ҳақидаги таклифи навбатдаги тузоқ бўлиши мумкинлигидан хавотирда. Бу ҳақда Axios портали хабар бермоқда.

Қайд этилишича, Ислом Республикаси вакиллари Покистон, Миср ва Туркиядан келган воситачиларга Америка ҳарбийларининг Яқин Шарққа кўчирилиши улардаги шубҳаларни янада кучайтирганини билдиришган. Уларнинг фикрича, тинчлик музокаралари ҳақидаги таклиф аслида чалғитувчи найранг бўлиши мумкин.

Axios нашрининг ёзишича, Эрон «яна алданиб қолишни истамайди», чунки ўтган йилнинг июнида ва шу йилнинг 28 февралида содир бўлган ҳужумлар айнан музокаралар қизғин паллага кирган вақтда амалга оширилган эди.

АҚШ томонидан Эронга тақдим этилган низони тугатиш бўйича 15 банддан иборат режа музокаралар учун асос сифатида кўрилмоқда. Америка маъмурияти вакиллари Теҳрон аввалги музокараларда рози бўлмаган ён беришларга бу сафар тайёрми ёки йўқми — шуни тушунишга ҳаракат қилмоқда.

Шу билан бирга, Қўшма Штатлар ҳамон Эронга қарши операциянинг қуруқликдаги босқичига ўтиш имкониятини кўриб чиқмоқда, бироқ бу бўйича ҳали якуний қарор қабул қилинмаган.