Видеодан кадр

Пойтахт ва Тошкент вилоятида сифати кафолатланмаган дори воситалари фош этилди. Бу ҳақда Давлат хавфсизлик хизмати хабар берди.

Маълум қилинишича, ДХХнинг Тошкент вилояти бўйича бошқармаси ва Иқтисодий жиноятларга қарши курашиш департаменти ходимлари ҳамкорлигида Паркент туманидаги «Паркент эркин иқтисодий» зонасида жойлашган фармацевтика маҳсулотлари ишлаб чиқарувчи МЧЖда текширув ишлари амалга оширилган.

Натижада корхона омборхонасида яроқлилик муддати тугаган 55 840 дона «Меновазин», 25 000 дона «Водород пероксиди», 50 800 дона «Этил спирти» ҳамда 28 млн 270 минг донадан ортиқ ёрлиқ ва этикеткалар сақланаётганлиги аниқланган.

Маълум бўлишича, яроқлилик муддати тугаган дори воситаларини 2025-2026 йилларда ишлаб чиқарилган деган маълумотлар билан қайта қадоқлаб, сотувга чиқариш режалаштирилган.

Пойтахтда кузатилган ҳолатда эса Фарғона шаҳрида яшовчи, 1987 йилда туғилган фуқаро тўхтатилиб, унинг қўл юклари белгиланган тартибда кўздан кечирилганда, Ўзбекистон ҳудудига олиб кирилиши тақиқланган, тахминий қиймати 763 млн сўмни ташкил этувчи 19 турдаги жами 6 597 дона дори воситалари борлиги аниқланган.

Дастлабки суриштирув жараёнида мазкур шахс дори воситаларини Ҳиндистондан олиб келиб, сотишни ўзининг 1984 йилда туғилган таниши билан биргаликда амалга ошириши аниқланиб, унинг хонадони ҳам кўздан кечирилган. Натижада тахминий қиймати 48 млн сўмга тенг бўлган 107 дона дори воситалари борлиги маълум бўлган.

Билдирилишича, ҳозирда ҳар икки ҳолат бўйича ашёвий далил сифатида олинган дори воситаларига нисбатан экспертиза текшируви тайинланиб, суриштирув ишлари олиб борилмоқда.