Эрон АҚШнинг ядро қуролини ишлаб чиқишдан воз кечиш бўйича шартларига рози бўлди. Бу ҳақда Америка етакчиси Дональд Трамп маълум қилди, унинг сўзларини РБК келтирмоқда.

— Ҳаммаси уларда ядро қуроли бўлиши мумкин эмаслигидан бошланган эди. Мен кеча [келишувнинг] ўнта асосий банди нималардан иборат эканлигини айтгандим. Биринчи, иккинчи ва учинчи банд — уларда ядро қуроли бўлиши мумкин эмас. Ва уларда бу қурол бўлмайди ҳам. Мен олдиндан гапиришни истамайман, лекин улар ҳеч қачон ядро қуролига эга бўлмасликка рози бўлишди. Улар бунга розилик беришди, — деди республикачи журналистларга.

Бундан олдин Трамп АҚШ Эрон билан «жуда самарали музокаралар» ўтказганини ва кўплаб асосий бандлар бўйича келишувга эришилганини билдирган эди.

Хорижий ОАВларнинг қайд этишича, Вашингтон Теҳрондан жами олтита банд бўйича розилик талаб қилмоқда. Уларнинг орасида ракета дастурини беш йилга тўхтатиб туриш (музлатиш), уранни бойитишни ноль даражага тушириш, Натанз, Исфахон ва Фордодаги ядровий объектларни фойдаланишдан чиқариш, уранни бойитиш учун центрифугалар ва уларга тегишли ускуналарни яратиш ҳамда улардан фойдаланиш устидан қатъий халқаро кузатув протоколларини жорий этиш каби шартлар бор.

Эрон Президенти Масъуд Пезешкиён эса мамлакат АҚШ билан ҳеч қандай музокаралар олиб бормаётганини таъкидлади. Унинг қайд этишича, агар АҚШ ва Исроил Эроннинг қонуний ҳуқуқларини тан олса, репарация (товон пули) тўласа ва келгусидаги тажовузлардан халқаро кафолатлар берсагина Яқин Шарқдаги уруш тугайди.