Эрон АҚШга ўт очишни тўхтатиш бўйича таклифлар юбормаган. Бу ҳақда Ислом Республикаси Межлисининг миллий хавфсизлик ва ташқи сиёсат қўмитаси аъзоси Ёқуб Ризозода маълум қилди, унинг сўзларидан ISNA агентлиги иқтибос келтирмоқда.

— Урушни ва ўт очишни тўхтатиш бўйича ҳеч қандай музокаралар, суҳбатлар ёки таклифлар бўлгани йўқ, — деб қайд этди у.

Ризозоданинг фикрича, АҚШ Президенти Дональд Трампнинг Эрон энергетика объектларига зарба бериш бўйича беш кунлик мораторий ҳақидаги баёноти жаҳон бозорларида нефть нархини назорат қилиш, шунингдек, ўзининг «маккорона ҳарбий мақсадларини» илгари суриш билан боғлиқ.

Бундан бир кун олдин Америка етакчиси Эроннинг энергетика инфратузилмасига берилаётган зарбаларни тўхтатиш бўйича топшириқ берганини маълум қилиб, сўнгги икки кун ичида Вашингтон ва Теҳрон самарали музокаралар ўтказганини ва улар ҳафта давомида давом эттирилишини таъкидлаган эди.

Шу билан бирга, Эрон Ташқи ишлар вазирлиги АҚШ билан музокаралар олиб борилганини рад этди, бироқ воситачилар орқали низони мулоқот йўли билан ҳал этиш истаги акс этган мактублар олганини тасдиқлади.