Россия вакиллари Вашингтонга келишув таклиф қилишди: агар АҚШ Украинага Россия ҳақидаги разведка маълумотларини беришни тўхтатса, Москва ҳам Эронга разведка маълумотларини, масалан, Яқин Шарқдаги Америка ҳарбий объектларининг координаталарини беришни тўхтатишини билдирган. Бу ҳақда 20 март куни Politico нашри ўз манбаларига таяниб хабар берди.

Манбаларга кўра, Россия Президентининг махсус вакили Кирилл Дмитриев ушбу таклифни ўтган ҳафта Майамида бўлиб ўтган учрашувда АҚШ Президентининг махсус элчиси Стив Уиткофф ва Дональд Трампнинг куёви Жаред Кушнерга етказган.

Politico манбаларининг таъкидлашича, АҚШ бу таклифни рад этган.

Шу билан бирга, нашрнинг қайд этишича, бундай таклифнинг ўзиёқ европалик дипломатларни хавотирга солган. Улар Москва Европа ва АҚШ ўртасига нифоқ солишга уринаётганини ҳисоблашмоқда. Европа Иттифоқи дипломатларидан бири Россиянинг бу таклифини «ҳаддан ортиқ ва жирканч» деб атаган.

Оқ уй бу бўйича изоҳ беришдан бош тортди. Россиянинг Вашингтонгаги элчихонаси эса журналистлар сўровига жавоб бермаган.

Politico маълумотларига кўра, Россия АҚШ ва Исроилнинг Эронга қарши уруши туфайли Вашингтонга бир нечта таклифлар билан чиққан, бироқ Трамп маъмурияти уларни рад этган. Axios нашрининг ёзишича, Трамп Путиннинг Эроннинг бойитилган уранини Россияга ўтказиш ҳақидаги таклифини ҳам қабул қилмаган.

Разведка маълумотларидан хабардор манбанинг сўзларига кўра, Яқин Шарқда уруш бошланганидан бери Россия Эрон билан разведка маълумотлари алмашинувини ва ҳарбий ҳамкорликни кенгайтирган. The Wall Street Journal газетаси Москва Теҳронга сунъий йўлдош тасвирларини бераётгани, шунингдек, Эрон дронларининг зарбаларида иштирок этаётгани ҳақида ёзган эди. Кремль буни инкор этган бўлса-да, Стив Уиткофф Россиянинг сўзларига ишонишга тайёрлигини билдирган.

Дональд Трамп 13 март куни Fox News телеканалига берган интервьюсида Эрон ва Украина билан боғлиқ разведка маълумотлари алмашинуви ўртасида боғлиқлик борлигига шаъма қилган эди. Трамп: «Путин, эҳтимол, уларга (Эронга) озгина ёрдам бераётгандир ва у, катта эҳтимол билан, бизни Украинага ёрдам беряпти деб ўйлаётгандир, шундай эмасми?» — деган эди.