АҚШ Президенти Дональд Трамп Эронга қарши АҚШ-Исроил операцияси бошланиши ҳолатлари билан боғлиқ таънага жавобан Японияга Перл-Харбордаги ҳужумни эслатиб ўтди. Бу ҳақда ТАСС хабар бермоқда.

Япониялик журналист Америка етакчисидан нима учун Вашингтон Токио ва Европадаги иттифоқчиларини Эронга ҳужум қилиш нияти ҳақида олдиндан хабардор қилмаганини сўради.

«Биз бу ҳақда ҳеч кимга айтмадик, чунки тўсатдан зарба бериш омилини сақлаб қолмоқчи эдик. Тўсатдан ҳужум қилиш ҳақида Япониядан кўра яхшироқ ким билади? Нима учун сиз менга Перл-Харбор ҳақида айтмагандингиз? Менимча, сиз тўсатдан зарба бериш омилига биздан кўра кўпроқ ишонасиз. Айнан мана шу кутилмаганлик туфайли биз дастлабки икки кун ичида режалаштирилган мақсадларнинг 50 фоизини ёки ундан ҳам кўпроғини йўқ қилдик», — дея жавоб берди Трамп Оқ уйда Япония Бош вазири Санаэ Такаити билан бўлган учрашувда.

Маълумот учун: Япониянинг Гавайидаги АҚШ Ҳарбий-денгиз ва Ҳарбий-ҳаво кучлари базаларига — Перл-Харборга ҳужуми 1941 йил 7 декабрда содир бўлган. Шундан сўнг АҚШ Иккинчи жаҳон урушига Гитлерга қарши коалиция томонида қўшилган.