Европа Иттифоқи давлатлари раҳбарлари Яқин Шарқдаги энергетика ва сув объектларига зарба беришни тўхтатиш (мораторий жорий этиш) тўғрисидаги қўшма баёнотни имзоладилар. Бу ҳақда «Коммерсантъ» хабар бермоқда.

Ҳужжатда таъкидланишича, ушбу объектларнинг вайрон этилиши энергия ресурслари нархини ошириб юборган, шу билан бирга минтақада қурғоқчилик ва очлик хавфини юзага келтирган.

«Европа кенгаши вазиятни юмшатишга (деэскалация) ва максимал даражада вазминликка, тинч аҳоли ва фуқаролик инфратузилмасини ҳимоя қилишга, шунингдек, барча томонларни халқаро ҳуқуқ нормаларига тўлиқ риоя қилишга чақиради», — дейилади қўшма баёнотда.

ЕИ давлатлари Эроннинг «минтақа мамлакатларига йўналтирилган тартибсиз ҳарбий зарбаларини» қоралади. Европа Иттифоқи, агар ўт очиш тўхтатилса, Германия, Франция, Италия ва Нидерландиянинг Ҳўрмуз бўғозида кемаларнинг эркин ҳаракатланишини таъминлашга тайёрлигини тасдиқлади.

Эслатиб ўтамиз, аввалроқ Эрон ОАВлари ва расмийлари АҚШ ва Исроил томонидан ислом республикасининг жанубий қисмидаги нефть-газ соҳаси объектларига ҳужум уюштирилгани ҳақида хабар берган эди.