Yevropa Ittifoqi davlatlari rahbarlari Yaqin Sharqdagi energetika va suv obyektlariga zarba berishni toʻxtatish (moratoriy joriy etish) toʻgʻrisidagi qoʻshma bayonotni imzoladilar. Bu haqda “Kommersant” xabar bermoqda.

Hujjatda taʼkidlanishicha, ushbu obyektlarning vayron etilishi energiya resurslari narxini oshirib yuborgan, shu bilan birga mintaqada qurgʻoqchilik va ochlik xavfini yuzaga keltirgan.

“Yevropa kengashi vaziyatni yumshatishga (deeskalatsiya) va maksimal darajada vazminlikka, tinch aholi va fuqarolik infratuzilmasini himoya qilishga, shuningdek, barcha tomonlarni xalqaro huquq normalariga toʻliq rioya qilishga chaqiradi”, — deyiladi qoʻshma bayonotda.

YEI davlatlari Eronning “mintaqa mamlakatlariga yoʻnaltirilgan tartibsiz harbiy zarbalarini” qoraladi. Yevropa Ittifoqi, agar oʻt ochish toʻxtatilsa, Germaniya, Fransiya, Italiya va Niderlandiyaning Hoʻrmuz boʻgʻozida kemalarning erkin harakatlanishini taʼminlashga tayyorligini tasdiqladi.

Eslatib oʻtamiz, avvalroq Eron OAVlari va rasmiylari AQSH va Isroil tomonidan islom respublikasining janubiy qismidagi neft-gaz sohasi obyektlariga hujum uyushtirilgani haqida xabar bergan edi.