Видеодан кадр

Тошкент шаҳрининг Чилонзор туманида наркокурьерлар фаолиятига чек қўйган профилактика инспекторига муддатидан олдин майор унвони берилди. Бу ҳақда ИИВ Жамоат хавфсизлиги департаменти ахборот хизмати хабар берди.

Маълум қилинишича, жорий йилнинг 13 март куни Чилонзор тумани «Хирмонтепа» маҳалласи профилактика инспектори, капитан Лазиз Абдукаримов кўчада шубҳали ҳаракатланаётган икки нафар шахсни текшириш мақсадида тўхтатган. Бироқ гумонланувчилар ходимнинг қонуний талабига бўйсунмай қочишга уринган.

Профилактика инспектори улардан бирини қувиб етиб, ушлаган. Холислар иштирокида текширув ўтказилганда, унинг ёнидаги сумкадан 59 та зип-пакетга қадоқланган 295 дона прегабалин кучли таъсир қилувчи дори воситалари аниқланган.

Тезкор суриштирув давомида қўлга олинган шахс маҳалла ҳудудидаги бир нечта жойларга кўмиб қўйган ҳамда геолокация орқали белгилаб кетган дори воситалари ҳам аниқланиб, ашёвий далил сифатида олинган.

Жиноят қидирув бўлими ходимлари томонидан олиб борилган тезкор тадбирлар натижасида гумонланувчининг қочиб кетган шериги ҳам Шайхонтоҳур тумани ҳудудида қўлга олинган. Унинг ёнидан ҳам тарқатиш учун тайёрланган 35 дона кучли таъсир қилувчи капсула топилган.

Хизмат вазифасини сидқидилдан бажарган ҳамда мураккаб вазиятда қатъият билан ҳаракат қилган капитан Лазиз Абдукаримовнинг ушбу жасорати инобатга олиниб, Ички ишлар вазири буйруғи билан унга муддатидан олдин майор махсус унвони берилган.