Videodan kadr

Toshkent shahrining Chilonzor tumanida narkokuryerlar faoliyatiga chek qoʻygan profilaktika inspektoriga muddatidan oldin mayor unvoni berildi. Bu haqda IIV Jamoat xavfsizligi departamenti axborot xizmati xabar berdi.

Maʼlum qilinishicha, joriy yilning 13-mart kuni Chilonzor tumani “Xirmontepa” mahallasi profilaktika inspektori, kapitan Laziz Abdukarimov koʻchada shubhali harakatlanayotgan ikki nafar shaxsni tekshirish maqsadida toʻxtatgan. Biroq gumonlanuvchilar xodimning qonuniy talabiga boʻysunmay qochishga uringan.

Profilaktika inspektori ulardan birini quvib yetib, ushlagan. Xolislar ishtirokida tekshiruv oʻtkazilganda, uning yonidagi sumkadan 59 ta zip-paketga qadoqlangan 295 dona pregabalin kuchli taʼsir qiluvchi dori vositalari aniqlangan.

Tezkor surishtiruv davomida qoʻlga olingan shaxs mahalla hududidagi bir nechta joylarga koʻmib qoʻygan hamda geolokatsiya orqali belgilab ketgan dori vositalari ham aniqlanib, ashyoviy dalil sifatida olingan.

Jinoyat qidiruv boʻlimi xodimlari tomonidan olib borilgan tezkor tadbirlar natijasida gumonlanuvchining qochib ketgan sherigi ham Shayxontohur tumani hududida qoʻlga olingan. Uning yonidan ham tarqatish uchun tayyorlangan 35 dona kuchli taʼsir qiluvchi kapsula topilgan.

Xizmat vazifasini sidqidildan bajargan hamda murakkab vaziyatda qatʼiyat bilan harakat qilgan kapitan Laziz Abdukarimovning ushbu jasorati inobatga olinib, Ichki ishlar vaziri buyrugʻi bilan unga muddatidan oldin mayor maxsus unvoni berilgan.