Видеодан кадр

Кубанинг шимолида ҳукуматга қарши намойишчилар куни эрталаб Коммунистик партия идорасига ҳужум қилди. Давлатга қарашли нашр хабарига кўра, бундай очиқ норозилик ҳолатлари мамлакатда жуда кам учрайди. Намойишларга асосан кучайиб бораётган электр узилишлари сабаб бўлган бўлиб, бу ҳолат АҚШнинг нефть таъминотига қўйган чекловлари оқибатида янада оғирлашган.

Маълум бўлишича, 13 март куни кечқурун Морoн шаҳрида электр узилишлари ва озиқ-овқат танқислигига қарши тинч йиғилиш сифатида бошланган намойишлар шанбага ўтар кечаси зўравонликка айланган. Намойишчилар бино ойнасига тош отган ва кўчада ёнғин чиқарган. Ижтимоий тармоқларда тарқалган видеоларда катта ёнғин ва “эркинлик” деган чақириқлар эшитилгани акс этган.

Морон шаҳри Кубанинг шимолий соҳилида жойлашган бўлиб, пойтахт Гаванадан тахминан 250 мил (400 км) шарқда жойлашган. “Reuters” агентлиги ушбу тартибсизликлар акс этган видеолар ҳақиқийлигини мустақил тасдиқлай олмаганини билдирган.

Хабарларга кўра, АҚШ президенти Дональд Трамп жорий йилда Кубага нисбатан босимни кучайтирган. Жумладан, январь ойида Венесуэла президенти Николас Мадуро қўлга олингандан кейин Кубага юборилаётган венесуэла нефти тўхтатилган. Шунингдек, Кубага нефть сотган давлатларга тарифлар жорий этиш билан таҳдид қилинган. Бу эса озиқ-овқат, ёқилғи, электр энергияси ва дори-дармон танқислигидан азият чекаётган иқтисодиётга қўшимча босим ўтказган.

Айтиш жоиз, Кубада оммавий намойишлар, айниқса зўравон тусдаги чиқишлар жуда кам кузатилади. 2019 йилги Конституция фуқароларга намойиш ўтказиш ҳуқуқини берган бўлса-да, бу ҳуқуқни тартибга солувчи алоҳида қонун ҳалигача қабул қилинмаган. Морoн шаҳрида 2021 йил 11 июлда ҳукуматга қарши энг йирик намойишлардан бири бўлиб ўтган.