«Автойўлинвест» агентлиги директори ўринбосари Аслиддин Исаев «Ўзбекистон 24» телеканалига берган интервьюсида лойиҳа тафсилотлари билан ўртоқлашди.

Қурилиш қиймати 2,25 миллиард долларга баҳоланмоқда. Йўлнинг 140 километрида тупроқни мустаҳкамлаш, 7,2 километрида тош-шағалли устунлар билан мустаҳкамлаш, 132,8 километрида эса бўш тупроқни қум-шағал аралашмаси билан алмаштириш кўзда тутилган.

Лойиҳа доирасида 12 та транспорт боғламаси, 60 та туннель типидаги ўтиш жойи, 91 та кўприк, 16 та йўл ўтказгич, 258 та сув ўтказиш қувури қуриш режалаштирилган.

Исаевнинг сўзларига кўра, пуллик автойўл қурилиши натижасида пойтахтдан Самарқандгача бўлган масофани босиб ўтиш вақти 2–2,5 соатгача қисқаради.

Унинг қайд этишича, лойиҳа бўйича йирик инвестор-компаниялар билан музокаралар якунланган, ҳозирда молиялаштиришнинг асосий шартлари бўйича шартнома олди муҳокамалари олиб борилмоқда.

— Яқин вақт ичида амалий қурилиш ишларини бошлаш режалаштирилган. Лойиҳага Хитойнинг йирик инвесторлари, хусусан, дунёнинг топ-100 талигига кирувчи компаниялар қизиқиш билдирмоқда, — деди Аслиддин Исаев.

Йўлда 12 та кириш ва чиқиш пункти бўлади. Трасса рақамлаштирилади ва кечаю кундуз ишлайдиган интеллектуал транспорт тизимлари билан жиҳозланади.

Пуллик трасса Тошкентнинг Сергели туманидаги катта ҳалқа йўлидан бошланиб, Самарқанд вилоятида тугайди. У мавжуд йўлга параллел равишда ўтказилади.

Тарифлар якуний музокаралар натижасида, жумладан инвесторларнинг таклифларини инобатга олган ҳолда белгиланади.

Пуллик йўл қурилишини беш йил ичида якунлаш режалаштирилган. Шу билан бирга, трасса лойиҳа тўлиқ якунланишини кутмасдан, босқичма-босқич очилиши ҳам мумкин.