Айни вақтда Дубай шаҳрида вазият нисбатан барқарорлашган. Бу ҳақида Ўзбекистон Республикасининг Дубай шаҳридаги Бош Консулхонаси маълумот берди.

Хабарда айтилишича, ҳаво ҳудуди очилгани муносабати билан Дубай – Тошкент йўналиши бўйича авиақатновлар «UzAirways», «CentrumAir» ва «Qanotsharq» авиакомпаниялари орқали босқичма-босқич амалга оширилмоқда.

Маълумотларга кўра, 5–6 март кунлари «UzAirways» рейслари, 6 март куни «CentrumAir» рейси Тошкентга бўш жойлар билан қайтган.

Шунингдек, сўнгги кунларда «FlyDubai» ва «Air Arabia» авиакомпаниялари орқали чипта олган, аммо рейслари бекор қилинган ёки кечиктирилгани сабабли Дубайда қолиб кетган юртдошларимиз ўз тур-операторлари ёки авиакомпаниялар билан алоқага чиқиб, кунлик амалга оширилаётган рейслар орқали Ўзбекистонга қайтиш имкониятидан фойдаланишлари мумкин бўлади.

«Бош консулхона ходимлари юртдошларимиз мурожаатларини қабул қилиш ва зарур консуллик-ҳуқуқий ёрдам кўрсатиш мақсадида туну кун ишлашда давом этмоқда. Илтимос, вазият юзасидан фақат расмий манбалар орқали тарқатилаётган ахборотларга таянинг, тасдиқланмаган маълумотлар ва турли миш-мишларга ишонманг», — дейилади консулхона хабарида.