Оригинал дори яратилганидан 20-30 йил ўтиб, бошқа фармацевтика корхоналари ҳам бу дорини ишлаб чиқариши мумкин. Қайси компания ҳаракат қилиб, ушбу дорини ишлаб чиқариш технологиясини тезроқ ўзлаштирса, марра шуники бўлади.

Энг муҳими, талаб юқори бўлган бундай дориларни ички бозордаги нархи 5 баробаргача арзон бўлади.

Президент раислигида ўтаётган видеоселектор йиғилишида мана шундай дори воситаларини бир йил ичида ўзимизда ишлаб чиқаришни бошлаган корхоналарнинг технологияларни трансфер қилиш харажатининг ярми Фармацевтика жамғармасидан қоплаб берилиши маълум қилинди.

Шунингдек, энг кўп импорт қилинаётган 100 турдаги дориларни ишлаб чиқаришни кўпайтираман деган тадбиркорлар учун «Тошкент фарма парк» кластери ҳудуди яна 100 гектарга кенгайтирилади.

Жанубий Кореялик ҳамкорлар ўтган йили «Тошкент фарма парк»ка қўшиб берилган 60 гектарни бошқарувга олиш таклифини берган. Улар ўз ҳисобидан инфратузилмага 40 миллион доллар киритиб, ушбу ҳудудга Кореянинг нуфузли компанияларини олиб келиш истагини билдирган.

Мутасаддиларга бу борадаги музокараларни якунлаб, биофармацевтика ва косметика йўналишида камида 400 миллион долларлик лойиҳаларни шакллантириш топширилди.