Навоий кўп тармоқли тиббиёт марказида илк бор жигар трансплантацияси операцияси муваффақиятли ўтказилди.

Операция Миллий тиббиёт марказининг малакали мутахассислари, Жасур Собиров ва Аҳрор Сафаров бошчилигидаги жамоа ҳамда вилоят кўп тармоқли тиббиёт марказининг Мурод Аҳмедов раҳбарлигидаги малакали мутахассислари ҳамкорлигида амалга оширилди.

— Бемор Шерзод Жўраев 1983 йилда туғилган бўлиб, узоқ йиллар давомида жигар циррози касали билан оғриши оқибати жигар етишмовчилигига олиб келган, — дейди тиббиёт фанлари доктори Жасур Собиров. — Консерватив даволаш усуллари самара бермагани сабабли трансплантация ягона умидга айланган.

Беморга турмуш ўртоғи Наргиза Рўзиева донорлик қилишга рози бўлди. Ҳар икки мижоз операцияга тайёрланди. Барча лаборатор таҳлиллар, КТ ва МРТ текширувлари, қон гуруҳи ва тўқима мослиги аниқланди, кардиологик ва анестезиологик баҳолашлар амалга оширилди. Кўп тармоқли консилиумнинг ижобий хулосаси олинди.

Операция 12 соат давом этди.

— Иккита операция бригадаси бир вақтнинг ўзида ишлаб, бирида донордан жигарнинг бир қисми ажратиб олинган бўлса, — дейди вилоят кўп тармоқли тиббиёт марказининг раҳбари Мурод Аҳмедов. — Иккинчисида реципиентга трансплантация амалга оширилди. Айни вақтда донор ва реципиентнинг аҳволи ва гемодинамик кўрсаткичлар барқарор, шунингдек, трансплантат функцияси қониқарли ҳамда доимий тиббий назорат остида. Реципиентга тасдиқланган протокол асосида иммуносупрессив терапия тайинланган. Барча лаборатор кўрсаткичлар мунтазам назорат қилинмоқда. Инфекцион ва тромбоэмболик асоратларнинг олди олинмоқда.

Шу ўринда таъкидлаш жоиз, ушбу операция бир бемор ҳаётини сақлаб қолиш йўлидаги шунчаки воқеа эмас, балки Навоий вилояти соғлиқни сақлаш тизимида тўлиқ шаклланган трансплантация дастурининг бошланиши ҳамдир. Эндиликда жигарнинг оғир ва терминал босқичдаги касалликлари билан оғриган беморлар малакали, замонавий ва юқори технологияли тиббий ёрдамни ўз ҳудудида олиш имкониятига эга бўлдилар.

Темур ЭШБОЕВ, “Халқ сўзи”.