Интернетда тарқалган видеотасвирларга кўра, АҚШ армиясининг танкер самолётлари Тель-Авивдаги Бен Гурион аэропортида саф тортган. Бу ҳақида BILD нашри хабар берди.

Маълум бўлишича, шу йилнинг 24 февраль куни Қўшма Штатлар Исроил ҳудудидаги базага 12 та F-22 қирувчи самолётларини жойлаштирган. Таҳлилчиларнинг фикрича, ушбу қирувчи учоқлар Эронга нисбатан эҳтимолий уруш ҳолатида унинг Ямандаги иттифоқчилари томонидан бериладиган зарбаларни тўхтатишга сафарбар қилиниши мумкин.

Сабаби бу турдаги қирувчи самолётлар айнан жавоб зарбалари сифатида берилиши мумкин бўлган ҳарбий ҳаракатларда ҳужумни тўхтатиш учун катта салоҳиятга эгалиги билан ажралиб туради.

Шунингдек, АҚШнинг иккинчи авиаташувчиси «USS Gerald R. Ford» флоти Ўрта ер денгизига етиб келган ва яқин кунларда Исроилнинг Ҳайфа шаҳри яқинида лангар ташлаши режалаштирилган. АҚШ президенти Дональд Трамп Эрон расмийлари билан музокаралар боши берк кўчага кириб қолган тақдирда, мамлакатга қарши ҳарбий ҳаракат бошлаш учун тайёр бўлиш муҳим аҳамиятга эга эканини билдирган.

Маълумот учун, АҚШ Эронга ядровий ва ракета дастурларига тўлиқ чек қўйиш, шунингдек, минтақадаги ҲАМАС, Ҳизбуллоҳ ва ҳусийлар каби Эрон билан иттифоқдош гуруҳларни қўллаб-қувватлашни тўхтатиш шартини қўймоқда. Аввалроқ, Оқ уй раҳбари Теҳронга музокараларда келишувга эришиш учун икки ҳафта муҳлат берилгани тўғрисида хабарлар тарқалган эди.