Австралияда инсониятнинг йўқ бўлиб кетиш сабаблари қайд этиб бориладиган «қора қути» қуриш режалаштирмоқда. Бу ҳақида BILD нашри хабар берди.

Унда айтилишича, «Ернинг қора қутиси» номли ушбу лойиҳа Тасманиянинг ғарбий қисмида амалга оширилиши мумкин. Ушбу қути кўринишидаги объект тахминан ўн метр узунликдаги пўлат монолит бўлиб, инсоният тарихини ва унинг йўқ бўлиб кетиши мумкин бўлган сабабларини қайд этиб боришга мўлжалланган.

Маълумотларга кўра, 7,5 сантиметр қалинликдаги пўлат конструкция узоқ ва геологик жиҳатдан барқарор ҳудудда гранит асосга ўрнатилади. Мазкур лойиҳа ғояси Тасмания университети, «Clemenger BBDO» ҳамда «The Glue Society» бадиий гуруҳи томонидан илгари сурилган.

Мазкур қурилма қуёш энергиясида ишлайди ва асрлар давомида иш фаолиятида бўлиши кутилмоқда. Унда CО₂ концентрациясини, ҳаво ва океан ҳароратини, денгизнинг кислоталаниш даражасини, энергия сарфини, шунингдек, сиёсий қарорлар, янгиликлар ва ижтимоий тармоқлардаги постларни доимий равишда қайд этадиган маълумотларни сақлаш тизимлари ўрин олади.

Лойиҳа яратувчиларининг таъкидлашича, глобал инқироз юз берган тақдирда, «қора қути» келажак авлодларга нима бўлганини тушунишга имкон беради. Ушбу тизим 2026 йилдан кечиктирмаган ҳолда, тўлиқ ишга туширилиши режалаштирилган.