Эммануэль Макрон Европа Иттифоқининг ҳозирги вақтда суст ҳаракат қилаётгани ва ички бўлинишларга дуч келаётганини кескин танқид қилди. Бу ҳақида BILD нашри маълум қилди.

Франция президентининг таъкидлашича, Европа тарихда ҳам айнан суст ҳаракат қилгани ҳамда ички бўлинишларга учрагани эвазига муваффақиятсизликка юз тутган. Макрон бунга 2008 йилги молиявий инқироз даврини мисол қилиб, инқироз АҚШда бошланган бўлсада, Европа давлатлари биргаликда ҳаракат қилмагани туфайли Қўшма Штатлардан ўн баравар кўпроқ зарар кўрганини қўшимча қилган.

Шунингдек, Франция етакчиси COVID-19 пандемияси даврида Европа мамлакатлари биргаликда, тезкор ҳаракат қилгани учун яхши натижаларга эришганини таъкидлаган.

«Европа олдида янги ва янада мураккаб синовлар турибди. Жумладан, АҚШ президенти Дональд Трамп омили, савдо тарифлари, Гренландия билан боғлиқ масалалар ҳамда Европанинг хавфсизлик борасидаги хотиржамлиги жиддий хавф туғдирмоқда. Асло ҳаммаси бир лаҳзада тугайди деб ўйламанг. Ҳар куни, ҳар ҳафтада янги таҳдидлар пайдо бўлмоқда. Европа травматик ҳолатда яшаяпти», — деган Франция раҳбари.

Макроннинг фикрича, Европа ўз кучи ҳақида жиддий ўйлаши, мудофаа салоҳиятини мустаҳкамлаши ва стратегик соҳаларга сармояни кескин ошириши зарур. Хусусан, мудофаа, илғор технологиялар, сунъий интеллект ва квант ҳисоблаш йўналишларига катта маблағ йўналтирилиши лозим.

«Агар биз ҳеч нарса қилмасак, Европа беш йилдан кейин йўқ бўлиб кетади», — дея огоҳлантирган Эммануэль Макрон.