Пойтахтда бир неча кун давом этадиган ёғингарчилик ва шамол кучайиши кутилмоқда. Шу муносабат билан Тошкент шаҳар ҳокимлиги шаҳар аҳолиси ва меҳмонларига огоҳлантириш билан чиқди.

Унда айтилишича, тупроқнинг ҳаддан зиёд намланиши оқибатида дарахтларнинг илдиз тизими заифлашиши мумкин. Бу эса дарахтлар ва йирик шоҳларнинг қулаб тушиш хавфини оширади.

Пойтахт ҳокимлиги ноқулай об-ҳаво шароитида қуйидаги эҳтиёт чораларини кўришга чақирган:

• автомобилларингизни дарахтлар ва электр узатиш линиялари остида қолдирманг;
• шаҳар кўчалари ва ҳовлиларда ҳаракатланаётганда эҳтиёткор бўлинг;
• иложи борича эски ва қийшайган дарахтлар бор жойлардан узоқроқ юринг;
• ўзингизни, яқинларингизни ва шахсий мол-мулкингизни асранг.

Шунингдек, фавқулодда вазиятлар юз берган тақдирда, 112, 1055, (71) 212-69-80, (71) 212-69-82 телефон рақамларига мурожаат қилишлари эслатиб ўтилган.

«Тегишли шаҳар хизматлари кучайтирилган тартибда ишламоқда. Хотиржам бўлинг, эҳтиёткорлик билан ҳаракат қилинг ва расмий маълумотларга таянинг. Ўзингизни эҳтиёт қилинг», — дейилади огоҳлантириш хабарида.