Энергия ресурсларидан ноқонуний фойдаланиш ҳолатлари фош этилди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, департаментнинг Косон тумани бўлими томонидан ўтказилган терговга қадар текширув давомида ЯТТ «М.Х.» фуқаро Х.Б. ва бошқалар «Янгиобод» МФЙ ҳудудидаги новвойхонада тижорат мақсадида газ тармоғига яширинча уланиб олгани аниқланган.

Ушбу қонунбузилиш ҳолати оқибатида, жами 151,8 миллион сўмлик табиий газдан ноқонуний фойдалангани, шунингдек, ўзларининг ноқонуний ҳаракатларини яшириш мақсадида текширувга сохта ҳужжатлар тақдим этгани фош қилинган.

Шу каби яна бир ҳолат, департаментнинг Учтепа туман бўлими томонидан ўтказилган терговга қадар текширувда ҳам аниқланган.

Унга кўра, «О.Ў.« МЧЖ масъул шахслари ва бошқалар савдо ва маиший хизмат кўрсатиш биносида тижорат мақсадида умумий фойдаланишдаги электр тармоғига ўзбошимчалик билан уланиб, 131,4 миллион сўмлик электр энергиясидан ноқонуний фойдалангани маълум бўлган.

Ҳозирда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.