Муҳокамалар порталига «Касбий таълим ташкилотлари ўқувчилари ўқишини кўчириш ёки қайта тиклаш, умумий ўрта таълим мактабларнинг 10-синф ўқувчиларини техникумларга кўчириш бўйича давлат хизматларини кўрсатишнинг маъмурий регламентини тасдиқлаш тўғрисида»ги Ҳукумат қарори лойиҳаси жамоатчилик муҳокамаси учун жойлаштирилди.

Мазкур лойиҳага кўра, мактабларнинг 10-синф ўқувчиларини техникумларга ўқишини кўчириш фақат жорий ўқув йилида бошланғич касбий таълим дастурлари асосида мактабларнинг 9-синф битирувчилари ҳисобидан шакллантирилган кундузги таълим шаклига рухсат берилиши белгиланган.

Маълумот учун, ўқишини кўчириш бўйича аризаларни рўйхатдан ўтказиш Давлат хизматлари маркази, ЙИДХП ёки махсус платформа орқали қишки таътил даврида 28 декабрдан 17 январгача амалга оширилади.

Талабгорлар қуйидаги ҳужжатларни тақдим этади:

• ўқувчининг шахсини тасдиқловчи ҳужжат паспорти ёки идентификация ID-картасидаги ЖШШИР;
• вояга етмагани сабабли туғилганлик тўғрисидаги гувоҳномаси маълумотлари.

Мазкур Низом қоидалари нодавлат касбий таълим ташкилотлари учун тавсиявий ҳисобланади.

Қуйидаги ҳолларда 10-синф ўқувчиларининг ўқишини техникумларга кўчириш тақиқланади:

• техникумларда жорий этилган халқаро ва қўшма таълим дастурларига;
• дуал таълим дастурларига;
• семестр (курс) якуни бўйича фан (модуль)лар фарқини ўзлаштириш муддати икки ойдан ортиқ бўлган тақдирда;
• техникумларда амалга оширилаётган ўрта ва ўрта махсус касбий таълим дастурларига.