Мактабгача ва мактаб таълими вазирининг 2026 йил 4 февралдаги тегишли буйруғи билан «Йил ўқитувчиси» танловининг иккинчи босқичи баҳолаш мезонлари тасдиқланди. Бу ҳақида Бу ҳақида Таълим назорати Telegram-канали хабар берди.

Унга кўра, жараёнлар 10 та мезон асосида ҳамда уларнинг ҳар бири Ҳакамлар ҳайъати томонидан 6 баллдан (максимал 60 балл), педагогларнинг овоз бериш йўли орқали 4 баллдан (максимал 40 балл) баҳоланади (жами: максимал 100 балл).

Баҳолаш мезонлари қуйидагилардан иборат:

• Дарс мақсадларининг тўғри қўйилиши ва уларга эришилганлиги;
• Дарс тузилиши, изчиллиги ва вақтнинг тўғри тақсимланганлиги;
• Ўқув-методик таъминот, АКТ ва интерактив воситалардан фойдаланилганлиги;
• Замонавий педагогик усуллар ва ноанъанавий ёндашувлар (5E, 3S+1E, inquiry-based, problem-based, project-based, шахсга йўналтирилган таълим) дарс мавзуси, мақсадлари, ўқувчилар аудиториясига мос ва самарали тарзда қўлланилганлиги;
• Мавзуни тушунарли, мантиқий ва равон баён этилганлиги;
• Мисоллар келтириш, реал ҳаёт билан боғлаш ва амалий фаолиятни намоён этилганлиги;
• Ўқувчилар фаоллигини бошқариш, диққатини жалб қилиш ва тенг имкониятларни таъминлаш;
• Танқидий ва таҳлилий фикрлашни ривожлантириш;
• Ўқув муҳитини хавфсиз ва ижобий руҳда ташкил этиш, тарбиявий компонентларнинг мавзу мазмунига сингдирилганлиги;
• Баҳолаш усулларидан фойдаланиш ва доимий конструктив қайта алоқани (feedback) таъминланганлиги.

Маълумот учун, «Йил ўқитувчиси» танлови Ташкилий қўмитасининг қарорига асосан, танловнинг иккинчи босқичи жорий йилнинг 10 февраль куни белгиланган умумтаълим мактабларида бошланиши режалаштирилган.