Қонун (ЎРҚ–1116-сон, 04.02.2026 й.) билан Маъмурий жавобгарлик тўғрисидаги кодексга қўшимча ва ўзгартиришлар киритилди. Унга кўра, махсус автоматлаштирилган фото ва видео қайд этиш техника воситалари орқали қайд этиладиган маъмурий ҳуқуқбузарликларнинг қатъий рўйхати белгиланди.

Маълум қилинишича, қуйидагилар махсус автоматлаштирилган фото ва видео қайд этиш техника воситалари орқали маъмурий ҳуқуқбузарликлар сифатида расмийлаштирилади:

• хавфсизлик камаридан фойдаланиш қоидаларига риоя этмаслик;
• транспортни бошқариш вақтида телефондан фойдаланиш;
• белгиланган ҳаракат тезлигини соатига 20 километрдан кўп бўлмаган катталикда ошириб юбориш;
• тўхташ ёки тўхтаб туриш қоидаларини бузиши ва бошқалар.

Шунингдек, мазкур ҳуқуқбузарликлар учун жазо қўллаш муддатлари ҳам аниқ белгиланган.

Йўл қоидалари бузилганлиги фото ва видео қайд этиш техника воситалари орқали қайд этилганда маъмурий жазо ҳуқуқбузарлик содир этилган кундан эътиборан 1 ойдан кечиктирмай қўлланилади.

Маъмурий жавобгарликка тортиш тўғрисидаги қарор устидан шикоят қилинганда эса ҳуқуқбузарлик содир этилган кундан эътиборан 1 йилдан кечиктирмай қўлланилиши мумкин бўлади.