Фото: Муҳсин Умурзоқов / «Халқ сўзи»

«Ўзгидромет» 6 февралгача бўлган об-ҳаво маълумотини эълон қилди. Унга кўра, Туркманистондан нам ҳаво массалари кириб келиши сабаб ушбу ҳафта беқарор об-ҳаво кузатилиши мумкин.

Прогнозларга кўра, республика бўйича баъзи жойларда ёмғир ёғади, фақат 4 февралда ёғингарчилик кутилмайди. Тоғ олди ва тоғли ҳудудларда вақти-вақти билан ёғингарчилик (ёмғир, қор) бўлади, 2—3 февралда баъзи жойларда кучли бўлиши мумкин. Ўзбекистон ҳудуди бўйича ҳарорат фони кечалари 5-10 даража илиқ, кундуз кунлари 13-18 даража илиқ атрофида бўлади.

Жума куни эса вазият ўзгаради, Ўзбекистонга Қозоғистон ҳудудидан совуқ ва нисбатан нам ҳаво массалари кириб келиши бошланади. Бунинг ҳисобига республика бўйича 6 февралда баъзи жойларда ёғингарчилик (ёмғир қорга айланади) бўлади. Ҳарорат кун давомида пасайиб, кечаси ва кундузи 1-6 даража илиқ; шимолда кечаси 7-12 даража совуқ, кундузи 0-5 даража совуқ бўлади.

Республика бўйлаб баъзи жойларга туман тушиши мумкин. 2-3 февраль кунлари республиканинг тоғли ҳудудларида қор кўчиши хавфи мавжуд.

Тошкентда 2 февраль куни вақти-вақти билан ёмғир ёғади. Ҳарорат 13-15 даража илиқ бўлади. 3 февралда кечаси ва эрталаб ёмғир ёғади. Кундузи ёғингарчилик кутилмайди. Ҳарорат кечаси 7-9 даража илиқ, кундузи 13-15 даража илиқ бўлади. 4 февралда ёғингарчилик кутилмайди. Ҳарорат кечаси 5-7 даража илиқ, кундузи 16-18 даража илиқ бўлади. 5 февралда вақти-вақти билан ёмғир ёғиши мумкин. Ҳарорат кечаси 7-9 даража илиқ, кундузи 13-15 даража илиқ бўлади. 6 февралда вақти-вақти билан ёғингарчилик (ёмғир қорга айланиши мумкин) бўлади. Ҳарорат кечаси ва кундузи 1-6 даража илиқ бўлади.