71 ёшида канадалик-америкалик актриса Кэтрин О’Хара вафот этди. У «Уйда ёлғиз» фильмидаги роли билан кенг танилган эди. Бу ҳақда TMZ хабар берди.

Variety маълумотларига кўра, актриса 30 январь куни Лос-Анжелесдаги уйида қисқа муддатли касалликдан сўнг вафот этган.

Кэтрин О’Хара 1954 йил 4 март куни Канаданинг Торонто шаҳрида туғилган. У илк бор 1979 йилда Canada After Dark телешоусида экранда кўринган. 1970 йилларда эса мультфильмлар овозлаштириш билан шуғулланган.

Катта экрандаги дебюти 1980 йилда «Double Negative» фильмида бўлиб ўтган.

Актриса «Уйда ёлғиз» ҳамда «Уйда ёлғиз 2: Нью-Йоркда йўқолган» фильмларида Кевин Маккалистернинг онаси — Кейт Маккалистер образини гавдалантирган.

Шунингдек, у «After Hours», «Beetlejuice», «A Mighty Wind» фильмларида, шунингдек «Schitt’s Creek», «The Last of Us» ва «The Studio» сериалларида ҳам суратга тушган.

Ижодий фаолияти давомида Кэтрин О’Хара кўплаб нуфузли мукофотларга сазовор бўлган. Жумладан, у икки марта «Emmy», бир марта «Олтин глобус», шунингдек, икки марта Актёрлар гильдияси мукофотини қўлга киритган.