Иллюстратив фото

Қозоғистоннинг Ақтобе вилоятида 54 нафар ўзбекистонликни олиб кетаётган автобус йўл-транспорт ҳодисасига учради. Бу ҳақда Ўзбекистоннинг Ақтау шаҳридаги Бош консуллиги хабар берди.

Қозоғистоннинг ваколатли идоралари маълумотига кўра, ҳодиса жорий йил 30 ноябрь куни соат 21:00 да «Россия Федерацияси – Актобе – Қизилорда – Алмата» республика аҳамиятига эга автомобиль йўлида содир бўлган.

Ичида 54 нафар Ўзбекистон фуқароси бўлган, «Москва – Тошкент» йўналиши бўйлаб ҳаракатланиб келаётган, давлат рақами «ВанҲоол» русумли йўловчи автобуси йўл-транспорт ҳодисасига учраган. Қайд этилишича, ЙТҲ оқибатида жабрланган ва ҳалок бўлганлар йўқ.

Барча йўловчилар фавқулодда вазиятлар хизмати ва полиция ходимлари томонидан Актобе вилояти Айтекеби тумани Қорабутоқ қишлоғидаги масжидга вақтинча жойлаштирилган. Уларга озиқ-овқат ва зарур ёрдамлар кўрсатилмоқда.

«Вазият Ўзбекистоннинг Қозоғистондаги элчихонаси ва Бош консуллиги томонидан тўлиқ назоратга олинган бўлиб, Қозоғистон томонининг масъул идоралари билан доимий алоқа ўрнатилган», дейилади хабарда.

Қўшимча қилинишича, ҳозирги вақтда фуқароларни Ўзбекистонга бошқа автобус орқали тезкор равишда қайтариш чоралари кўрилмоқда.