Фото: Thanh Hue/Getty Images

Сўнгги ҳафта давомида Индонезия, Таиланд, Вьетнам, Малайзия ва Шри-Ланкада содир бўлган сув тошқинлари ва кўчкилар камида 326 кишининг ҳаётига зомин бўлди.

Бу ҳақда Буюк Британия оммавий ахборот воситалари хабар берди. Аввалроқ 141 киши ҳалок бўлгани ҳақида хабар берилган эди.

Хусусан, Индонезиянинг Суматра оролидаги сув тошқинларида камида 90 киши ҳалок бўлган. Расмийлар оролнинг шимолида тахминан 6500 кишини ва жанубда 12000 кишини эвакуация қилишди. Ушбу ҳудудда 5000 дан ортиқ уй ва бошқа бинолар сув остида қолди. Сўнгги тўрт кун ичида оролда ёққан ёмғир миқдори 800 мм.га етган.

Шри-Ланкадаги сув тошқинларида камида 65 киши ҳалок бўлди, яна 21 киши бедарак йўқолди. Яқин соатларда оролда об-ҳаво шароити ёмонлашиши прогноз қилинмоқда.

«Associated Press» агентлигининг хабар беришича, Таиландда қурбонлар сони 80 дан ошди.

Малайзияда сув тошқинлари икки кишининг ҳаётига зомин бўлди ва қутқарувчилар 34 000 нафардан ортиқ одамни эвакуация қилишди.

Вьетнамнинг марказий қисмида, аввал хабар қилинганидек, бир ҳафтадан кўпроқ давом этган сув тошқини ва кўчкилар оқибатида ҳалок бўлганлар сони 98 га етди.