Ғиждувон туманининг “Зарангари” маҳалласида 9799 нафар аҳоли истиқомат қилади. Ҳудудда 265 нафар ногиронлиги бўлган фуқаро бор. Улардан бири — Шаҳло Насуллаева.

Маҳалла ижтимоий ходими Феруза Самадованинг билдиришича, ёшлигидан ногиронлиги бўлган бу ҳамюртимиз уйда таълим олган. Сўнгра тикувчиликни ўрганган.

— Маҳалла “еттилиги”нинг қўллаб-қувватлаши билан унга тикув машинаси олиб берилди, — дейди Ф. Самадова. — Кейин эса электрон юритмали аравача ажратилди. Шаҳло Насуллаева энди кўчада бемалол сайр қилиши, қариндошлари, қўни-қўшнилар билан учрашиб, кўнгил чигилини ёзиши мумкин. Биз айни пайтда у билан “мини лойиҳа” устида ишлаяпмиз. Гап шундаки, матонати ва меҳнатсеварлиги билан бошқаларга ибрат бўлаётган бу маҳалладошимиз ҳудуддаги эҳтиёжманд оила фарзандларига ҳам тикувчилик сир-асрорларини ўргатиш ниятида.

  Ҳа, имконияти чекланган киши ҳам бошқалар учун имконият ярата олади. Фақат одамда қатъият, ишонч бўлса, бас. Дарвоқе, маҳаллада шу йилнинг ўтган даврида Шаҳлога ўхшаган 15 нафар фуқаро ижтимоий ходимнинг саъй-ҳаракати туфайли реабилитация таянч воситалари ва бошқа зарур жиҳозлар билан таъминланди.

Истам ИБРОҲИМОВ

(«Халқ сўзи»).