Ўзбекистон Республикаси АҚШ Президенти Дональд Трампнинг бевосита кўмагида Ғазо секторида ўт очишни тўхтатиш ва гаровга олинганларни озод этиш бўйича эришилган келишувни олқишлайди, дея баёнот берди Ташқи ишлар вазирлиги.

Вазирлик баёнотида Миср, Қатар ва Туркиянинг ушбу муҳим жараёнда мувофиқлаштирилган фаолиятини ва уларнинг ролини юқори баҳоланган. Мазкур саъй-ҳаракатлар зўравонликни тез фурсатда тўхтатиш, гуманитар инқирозни енгиллаштириш ҳамда сиёсий мулоқотни тиклаш учун замин яратаётгани ҳам алоҳида қайд этилган.

«Ўзбекистон доимо халқаро ҳуқуқ меъёрлари ва БМТ Хавфсизлик Кенгаши резолюциялари асосида Яқин Шарқда мустаҳкам ва адолатли тинчлик ўрнатилишини қўллаб-қувватлайди.

Ўт очишни тўхтатиш вақтинчалик чора эмас, балки томонлар ўртасида хавфсизликни таъминлаш, барқарор ҳамжиҳатликни ўрнатиш ва ўзаро ишончни тиклашга қаратилган узоқ муддатли сиёсий ечим сари муҳим қадам бўлишига ишончимиз комил», дейилади ТИВ баёнотида.

Расмий Тошкент, шунингдек, Яқин Шарқда тинчлик, барқарорлик ва гуманитар енгилликни таъминлашга қаратилган халқаро саъй-ҳаракатларга конструктив ҳисса қўшишга тайёрлигини билдирган.

Исроил ва ҲАМАС келишувга эришди

«Al Jazeera» нашрининг маълум қилишича, Исроил ва ҲАМАС музокараларининг биринчи қисми якунланди ва улар асирларни алмашиш, ўт очишни тўхтатишга келишиб олган.

Исроилнинг АҚШдаги элчиси Ечиэл Леитер ҲАМАС йиғилишдан сўнг 72 соат ичида асирларни озод қилишини айтган. Элчининг айтишича, Исроил хавфсизлик маҳкамаси бугун фаластинлик маҳбуслар рўйхатини тузади.

Жараён шундай давом этса, исроиллик асирлар ҳам якшанба ёки душанба куни озод этилиши мумкин. Элчи Ечиэл Леитер CННга берган интервьюсида айтадики, ўт очишнинг тўхташи урушнинг бутунлай тугашига умид уйғотсада ҲАМАС томонидан шартларнинг қанчалик бажарилишига боғлиқ бўлиб қолаверади.

Исроил армияси Ғазо бўйича келишувни амалга ошириш учун оператив тайёргарликни бошлаган.